竞彩足球：多特蒙德欲攻陷汉堡

    北京时间11月5日晚上，德甲第十轮继续有好戏上演，联赛副班长汉堡将坐镇主场迎战豪门多特蒙德。近两季一直喺度挣扎嘅汉堡本赛季好似全面崩盘，前9轮联赛无一场赢过，咁嘅表现想要喺多特蒙德身上攞返自信心有难度。

     就算汉堡近年主场面对多特蒙德都占据上风，不过佢哋今时不同往日，虽然队中不乏令人耳熟能详嘅球员，后卫祖亚奥以及中场菲腊哥斯迪、霍尔特比都可以独当一面，但系足球系团体运动，教练拉巴特亚喺带队攞到1平4负嘅开局成绩单之后，球队高层终于忍不住要炒咗佢，依家嘅教练基斯度尔上任之后，球队都无乜好转，最主要系呢班波实在太过散漫，各有各踢，根本不似一个整体。再者，本以为德国杯第二圈取得1场大胜嘅汉堡可以借此重回正轨，好遗憾嘅系，佢哋上轮净负本赛季表现出色嘅科隆三球，再一次由天堂跌落地狱，队中将士必然受挫。最为值得留意嘅系，汉堡本赛季除咗前锋波比活特之外，就好似无人识入波，前9轮联赛汉堡就入过2波，都系呢位美国前锋贡献嘅，好可惜佢因为上一场攞到红牌，本场要停赛受罚，连队中最强嘅攻击点都无得登场，汉堡本场想不输都几难。阵容方面，后卫史柏希锡因伤休战。

     即使多特蒙德队中包括后卫施梅尔策、中场斯文本德以及前锋罗伊斯等球员都因伤缺阵，但球队嘅班底厚度十足，真达引领后防线、韦高、干沙路卡斯特路同埋格策喺中场做调度，拉莫斯以及奥士文登贝莱呢D冲得跑得嘅球员喺前场冲锋陷阵，佢地嘅阵容依然可以做到进可攻退可守。而且多特蒙德本赛季一如既往地展现攻势足球强大嘅一面，场均联赛可以斩获2.22个入波，汉堡条场均联赛失2波嘅后防线好大机会会被戏耍。另外，由于近期联赛不断失分，令到多特蒙德已经落后榜首嘅拜仁慕尼黑8分，球队要继续威胁到拜仁，咁佢地必需要尽快振作，本轮走访副班长汉堡就正合多特蒙德嘅胃口。投注方面，澳彩为呢场比赛开出上下盘分界线为2.5/3，两队近2次交手全场进球总数都喺3球或以上，以依家多特蒙德咁强嘅攻击力对住汉堡好似厕纸咁一桶就穿嘅后防线，此番不妨落注上盘更为稳阵。