竞彩足球：英超争四迷雾

    喺利物浦同曼城正为联赛冠军宝座斗餐饱之际，本赛季英超争四大战同样系异常激烈。托特纳姆热刺、切尔西、阿森纳和曼联如今正为英超三、四位作最后一搏，喺联赛即将收咧嘅情况下，大家都渴望能够成为最终嘅幸运儿，但争四战役注定会系有人欢喜有人愁。

    托特纳姆热刺主动权尽握

     虽然啱啱不敌曼城无缘联赛三连胜，但如今34轮过后手握67分暂列积分榜第三嘅托特纳姆热刺恐怕仍然系争四阵营中最好环境嘅。皆因余下4轮联赛除咗布赖顿需要为保级续命之外，其余3场均有十足嘅把握可以攞足分数，而且其中3场坐镇主场也系一大优势。可能需要分心应付欧冠半决赛会系托特纳姆热刺嘅一个争四变数，但佢哋如今只需要做好自己便无需睇人面色，相信主帅朴治天奴有足够嘅能力可以令到托特纳姆热刺成功到达彼岸。

     本赛季余下赛程：

     2019/04/24托特纳姆热刺对布赖顿

     2019/04/27托特纳姆热刺对西汉姆联

     2019/05/07伯恩茅斯对托特纳姆热刺

     2019/05/12托特纳姆热刺对埃弗顿

    切尔西押宝阿扎尔

     班主阿巴莫域治传闻话想放盘，头号球星阿扎尔又同皇马眉来眼去，加上主帅沙里又前途未卜，纵然切尔西如今同托特纳姆热刺同积67分，但士气动荡嘅佢哋争四道路显然不会平坦。目前已经战罢35轮嘅切尔西喺余下3轮联赛中，最为关键嘅当属本周末与曼联上演嘅“6分大战”。虽然话就话想痛打曼联呢只落水狗，但如今嘅切尔西也绝非昔日铁血蓝军。不过与习惯性发软蹄嘅阿森纳和跌入谷底嘅曼联相比，切尔西守住前四位置嘅可能性依然较大。阿扎尔今夏走不走无人知，但此时此刻呢位比利时球星仍然系切尔西争四嘅最大希望。

     本赛季余下赛程：

     2019/04/28曼联对切尔西

     2019/05/04切尔西对沃特福德

     2019/05/12莱切斯特城对切尔西

    枪手脚软令人忧

     正所谓家家有本难念的经，近期除咗曼联拥趸够晒闭翳之外，相信阿森纳粉丝都足够绝望。喺球队正值抢分之际，阿森纳喺上轮联赛竟然被基本无欲无求嘅水晶宫踩到上心口，而曾经主动权尽握嘅争四形势如今也渐趋被动。虽然话就话最后4场较量均无处于前列位置嘅球队，但其中也不乏布赖顿此等为生存而战嘅保级球队。论实力阿森纳当然有足够本钱睇住嚟食，但对于习惯性脚软嘅佢哋嚟讲，最后4场有3场作客赛事无疑系一个大考验。目前手握66分暂列第五嘅阿森纳纵使希望犹在，但喺后温格(ArseneWenger)时代，本应焕然一新嘅阿森纳最终也难逃争四嘅宿命甚为唏嘘。而一旦再度无缘欧冠赛场，阿森纳今夏定必会有一番巨变。

     本赛季余下赛程：

     2019/04/25狼队对阿森纳

     2019/04/28莱切斯特城对阿森纳

     2019/05/04阿森纳对布赖顿

     2019/05/12伯恩利对阿森纳

    曼联低迷恐出局

    索尔斯克亚嘅上任曾经令到曼联拥趸以为天选之人终于降临，但喺正式转正之后，呢位少帅先终于见识到曼联如今嘅水位究竟有几深。因为要数如今争四阵营中形势最不乐观嘅球队，相信都非曼联莫属。用内忧外患嚟形容如今嘅曼联都已经算俾面，皆因欧冠完败巴萨出局，过去5轮联赛也失咗9分，而上一场联赛作客惨吞埃弗顿四球甚至令球队内部如今矛盾顿生，不和谐声音此起彼伏。睇返曼联本赛季余下嘅4场联赛，除咗铁定降级嘅哈德斯菲尔德尚算容易抢分之外，其余3场面对曼城、切尔西和加的夫城都系仍有极大抢分欲望嘅球队，对目前呢支溃不成军嘅曼联嚟讲，踢少1轮落后第四位置3分嘅形势，争四看似机会犹在，但实则大门已经基本关上。而正如人生一样，春夏秋冬酸甜苦辣都需要一一历经，喺接连嘅动荡之下，进入寒冬期嘅曼联如今嘅问题恐怕已经不系单纯换帅或者几笔引援可以解决，成班波简直系一个坏咗嘅人。想要重拾昔日嘅荣光，想要揾返真正嘅自己，曼联条路仲有好长。

     本赛季余下赛程：

     2019/04/25曼联对曼城

     2019/04/28曼联对切尔西

     2019/05/05哈德斯菲尔德对曼联

     2019/05/12曼联对加的夫城