竞彩足球：AC上演华丽转身

    如果喺去年12月份同大家讲，本赛季头半段一直挣扎求存嘅AC米兰将会喺2018年迎嚟强势反弹，恐怕都会被人一笑置之。但世事往往就系咁奇妙，曾经一度跌至积分榜中游位置，并且班主李勇鸿接连被传遭遇破产，AC喺如此逆境嘅情况下竟然神奇反弹，用极为争气嘅表现有能力回应外界“AC已死”嘅批评声。

    AC元神归位

     喺上年9月尾至年底，AC一共只取得3场联赛胜利，不仅早早退出争冠集团，而且现塞维利亚教练蒙迪拿也于当时惨遭“豉椒炒鱿”。更加令人失望嘅系一众去年夏天喺AC引援狂潮中加盟嘅星级战将也因为不能力挽狂澜而被认为货不对板，可以讲，2017-18赛季头半段嘅AC绝对系黯淡无光。不过痛定思痛嘅AC却喺2018年令人意外哋上演华丽转身，球队不仅爆发出此前一直渴求嘅团队凝聚力，同时沉寂已久嘅博努奇、基斯尔、卡汉路古、皮克利亚及安赫尔施华也都终于兑现出自身该有嘅实力，喺众将“元神归位”嘅情况下，AC自1月头主场小胜克罗托内后，至今联赛保持不败。而且喺上轮击败切沃后，佢哋更加时隔4年之后再迎联赛五连胜，虽然冠军已经遥不可及，但欧冠资格却实实在在咁重燃希望，球队嘅转变可喜。

    强势仍有隐忧

     对于赛季中期接手AC嘅加度素而言，喺经历初始阶段嘅阵痛之后能够迅速带领球队重返正轨要令人俾个Like。但与其讲战术层面上嘅改变，呢位AC名宿更多带俾球队嘅系精神层面上嘅变化。喺球员时期已经以勇猛着称嘅加度素成功为球队注入咗久违嘅战斗精神，上半赛季嘅得过且过已经烟消云散，取而代之嘅系坚忍不拔嘅铁血作风，加上成功激活一批本已素质不俗嘅将士，因此AC战绩提升可谓水到渠成。不过佢哋并非全无隐忧，班主李勇鸿虽然早前公开辟谣财困传闻，但破产疑云仍然笼罩，一旦呢条大水喉出事，球队目前嘅良好态势随时会大受影响。与此同时，AC嚟紧将会相继遭遇班霸尤文图斯和那不勒斯，能否征服呢两座大山也令人期待。