竞彩足球：联合会杯群雄开“骚”

    2018年俄罗斯世界杯嘅脚步声已经越嚟越近，而一向作为世界杯前哨战嘅联合会杯也喺今夏如期而至。喺嚟紧6月17日至7月头呢大半个月时间里，包括2014年世界杯冠军得主德国在内嘅各大洲份冠军球队将会云集俄罗斯，为笑到最后势必使出浑身解数。与此同时，喺过去3届联合会杯中，南美洲国家对冠军形成柯断之势，本届代表南美洲出战嘅智利能否延续光荣传统也实在值得关注。

    A组欧洲力量话晒事

    (A组：葡萄牙、俄罗斯、新西兰、墨西哥)

     作为东道主，俄罗斯自然希望能够喺本届赛事其中交出令人满意嘅成绩单，既为回馈主场球迷嘅拥戴，也盼为明年喺本土进行嘅世界杯打响头炮。而睇返俄罗斯本次球队名单，入选球员全数效力于国内联赛球队，真可谓朝见口晚见面，默契程度势必无需怀疑；不过碍于俄罗斯近年没有太多令人眼前一亮嘅新星涌出，导致球队如今骨干力量仍为施亚哥夫和阿坚菲耶夫等老兵。幸好俄罗斯胜在攻守较为均衡，主场作战也肯定会加多两钱肉紧，只要一班中生代球员如斯姆洛夫能够把握杀机，相信晋级并非难事；至于墨西哥，贵为中北美洲霸主嘅佢哋实力自然有翻咁上下，队中更加有不少喺海外联赛效力嘅球星，其中由埃尔南德斯领衔嘅进攻端更加令人不容小觑。可惜墨西哥向来顺风波无敌，逆境波等死，今铺喺俄罗斯主场，稳定度将系佢哋嘅最大考验；与此同时，喺得两个出线名额嘅情况下，墨西哥除咗要同东道主硬碰硬之外，同组实力最强嘅欧洲新科霸主葡萄牙则犹如不可攀越嘅高山。论阵容，拥有C罗、贝拿度施华和佩佩等一众喺欧洲豪门效力嘅球星嘅葡萄牙可谓星光熠熠；论战术，经历过2016年欧洲杯洗礼嘅葡军如今体系成熟，老中青三代皆定位明确，莫讲联合会杯，就连明年世界杯夺冠大热都要预佢哋一份；而A组最后一支球队则为大洋洲冠军新西兰，虽然一日未登场都不知会发生乜事，但考虑到球队星味严重不足，竞争力实在有限，今铺就当系俄罗斯体验之旅。

    B组群雄并起有冷味

    (B组：智利、喀麦隆、澳大利亚、德国)

     相比A组嘅强弱分明，B组就显得相对错综复杂，皆因论实力，2014年世界霸主德国自然算得上鹤立鸡群。但令人怀疑嘅系，德国对于本届赛事嘅重视程度究竟去到边。因为从本次德军名单中可以发现基本无太多老臣子在阵，基本为平时嘅轮换球员或边缘球员为主，而队长一职也由巴黎圣日尔曼球星德雷克斯勒担任。而且喺备战期间，利莱辛尼和丹美相继因伤退队，但德国却一反常态并未征召新血入替，相反确定会以21人出战本届赛事；至于连夺两届美洲国家杯冠军嘅智利，随着桑切斯和比达尔等一批球星近年陆续崛起，球队如今可谓迎来一个最美好嘅年华。而对比起同组其余三个对手，本次俄罗斯之旅精锐尽出嘅智利明显目标并不会只满足于分组出线；另外，非洲劲旅喀麦隆队中虽无天皇巨星级别嘅球星，但入选球员皆绝大部分喺欧洲联赛寻梦，整体实力绝不失礼。而且非洲球队向来崇尚个人发挥，一旦比赛落入佢哋嘅节奏，相信任何球队都会头痕；相比较而言，澳大利亚三线实力喺B组其中处于下风，但球风接近传统英式足球嘅佢哋也并非弱旅，高强度对抗与异常出色嘅防守也势必会成为B组其余球队能否再进一步嘅试金石。

    揭幕战

    2017年6月17日(星期六)23:00俄罗斯对 新西兰