竞彩足球：“云厂长”迷雾前行

    英超啱啱收咧，转会市场随即暗流涌动，而正当各路豪强都纷纷开始对目标对象出击之际，阿森纳官方就喺5月31日提前为各位拥趸派出六一礼物。两年新约，令到功勋教练温格与兵工厂嘅缘分也延伸至2019年。但面对英超争冠之路愈发艰难，拥趸耐性已经几乎耗尽嘅局面，云厂长未来之路注定不容易行。

     对于部分厂迷嚟讲，温格再留两年绝非好消息，点解咁讲？皆因球队喺过去几年间，距离英超冠军越嚟越远，基本只能靠足总杯嚟吊盐水。与此同时，更加不能令拥趸所接受嘅就系球队本赛季英超最终仅取得第五，被同市死敌托特纳姆热刺压过嘅情况下，甚至无埋下赛季欧冠参赛资格。正所谓不破不立，外界好多声音都觉得兵工厂已经系时候要变了。但喺如今呢个名帅买少见少嘅年代，对于兵工厂而言，对球队知根知底嘅温格毫无疑问系一个没有更好选择时嘅最保险选择。强如曼联，喺费Sir退休之后也已经动荡数年，至今不能再一亲联赛冠军芳泽，直至本赛季穆里尼奥入主先有所起色。所以，温格留任势必会令到不少厂迷失望(尤其系租飞机横幅抗议温格各一批)。但佢嘅继续存在至少可以避免球队动荡加剧。

     不过温格想要喺新赛季用好成绩回报董事会嘅信任，首当其冲要解决嘅恐怕就系队内球星流失嘅问题。据《每日邮报》最新报导，已经决心今夏离队嘅桑切斯及坐等合同到期嘅厄齐尔虽然均齐齐表示续约可以倾，但周薪要求皆达到惊人嘅30万英镑。对于薪资结构一向严谨嘅兵工厂而言，呢个要求价码无疑等于对续约SayNo。另外，蒙雷亚尔、张伯伦和卢卡斯皮里斯近日都传出有离心，可见不佳嘅战绩不仅打击拥趸，就连队员都心生倦意。喺如今呢个足球世界其中，如果无大水喉射住都注定无法站上巅峰。而出手一向谨慎嘅兵工厂喺最近几个夏季转会期都不能带嚟惊喜。而最近被传同球队行得好埋嘅疑似新援也只系效力于比甲球队欧本嘅锋线新星H.奥耶古，对比曼市双雄喺度为大放异彩嘅麦巴比争到头崩额裂，兵工厂拥趸真系有苦说不出。