竞彩足球：山楂球场喜见“西”经

    对于曼联及阿森纳拥趸嚟讲，近期绝对会对西布朗维奇呢班波恨之入骨，因为呢两家豪门近期接连喺西布朗维奇身上失分，争四前景已经暗淡；对于西布朗维奇拥趸，爱队目前喺联赛30轮过后暂列第八嘅战绩也足以饮得杯落；而对于英超所有小球队而言，小本经营但又收效不俗嘅山楂球场主人绝对系值得学习嘅“西”经典范。

    铁血防守渐成标签

     单论阵容，虽然西布朗维奇成班波都感觉熟口熟面，但真正稍具星味嘅球员恐怕就只有中场硬汉弗莱彻及中卫埃文斯等豪门弃将。不过阿叔都有讲：“波，系圆嘅。”堆砌球星当然会系一条赢球捷径，但对于无大水喉射住嘅一众小球队而言，揾到适合自己嘅生存之道就显得至关重要。而喺主帅佩利斯嘅调教下，西布朗维奇全队上下都显得硬度十足，极具侵略性嘅防守及防不胜防嘅死球战术都成效甚大。与此同时，正所谓家有一老如有一宝，西布朗维奇喺防线上有现年37岁嘅中卫麦欧利压阵，佢同埃文斯搭档嘅中卫组合加上同样经验十足嘅门将宾科士打所组成嘅防守铁三角简直令人却步。因此喺攻击力一般嘅情况下，西布朗维奇如今能够稳居第八靠嘅就系一条赛季至本场均仅失1.27波嘅铁血防线(排名联赛前列)。如果再讲深少少，能够用有限嘅财力成功喺转会市场“淘宝”成功，西布朗维奇管理层也绝对应记一功。

    生存之道值得借鉴

     目前联赛仅余8轮，西布朗维奇领先降级区域已有17分优势，已算系基本上岸。而目前佢哋距离身前嘅埃弗顿则有6分差距，考虑到佢哋过去6季联赛最佳战绩也都只系第八，再创新高想必会系球队如今嘅一大目标。但即使最终事与愿违，西布朗维奇全队上下包括管理层嘅表现也足以令人敬佩。毕竟现今足球世界缺乏雄厚资金嘅支持下实在不容易一直喺顶级联赛生存，就连上赛季奇迹夺冠嘅莱切斯特城由于阵容深度不足，本赛季喺多线作战嘅情况下也显得顾此失彼，但西布朗维奇偏偏就系利用有限嘅资源成功令到效果达到自身最大化。始终对于一班小球队嚟讲，冠军彷佛系遥不可及嘅梦想，但健康稳定咁生存呢个目标就更加“贴地”，喺呢方面，山楂球场显然有大家所需嘅“西”经可取。